Разлики помеѓу аеробниот и анаеробниот тренинг

Можеби сте свесни дека треба да одвоите одредено време во текот на неделата за вежбање, но она што можеби не сте свесни е колку време треба да одвоите за анаеробни и аеробни тренинзи.

Речиси секој ги слушнал термините „аеробни“ и „анаеробни“ кои се користат во контекст на тренинг или фитнес, но не секој ја разбира разликата помеѓу двете.

Знаењето кој тип на вежбање е аеробен, а кој анаеробен прави голема разлика, како за вашето долгорочно здравје, така и за тоа колку време треба да поминете на велосипед или лента за трчање и колку време треба да потрошите на кревање тегови. Секако, ве советуваме секогаш да се консултирате со вашиот лекар пред да започнете одреден тип на вежбање.

Аеробен тренинг

„Аеро“ како префикс доаѓа од грчкиот збор за воздух. Под аеробен тренинг најчесто подразбираме активност при која ги движиме рацете и нозете за да го „работиме“ целото тело. Ги користиме нашите мускули во континуирани (и обично лесни за изведување) ритмички движења кои ги повторуваме, со што го зголемуваме отчукувањата на срцето и дишењето, а истовремено градиме физичка издржливост. Аеробен значи „со кислород“ – што значи дека со правење аеробни вежби, користиме кислород за согорување на масти и јаглехидрати. Друго име за аеробни вежби се кардиоваскуларни вежби бидејќи отчукувањата на срцето се зголемуваат и ни снемува воздух. Како што дишеме потешко, при овој тип на тренинг, со секое издишување, исфрламе јаглерод диоксид од нашето тело, а млечна киселина не се произведува, како при анаеробниот тренинг.

Видови аеробни тренинзи

Аеробните вежби, до одреден степен, можат да се поделат во три групи, во зависност од тоа колку енергија е потребна за извршување на одредена активност. Првата група вклучува лесни физички активности како што се: пешачење, џогирање, возење велосипед и качување по скали. Втората група вклучува умерени до интензивни вежби како што се: часови по танц, планинарење, пливање. Додека третата група на вежби се карактеризира со интензивни и исцрпувачки вежби вклучени во спортови како кошарка, тенис и одбојка.

Придобивките од аеробниот тренинг

Аеробниот тренинг не само што го подобрува целокупното здравје и квалитетот на животот, туку и го зголемува животниот век. Аеробниот тренинг ги согорува мастите, го подобрува расположението, ги зајакнува срцето и белите дробови, го намалува ризикот од дијабетес, го зајакнува имунолошкиот систем и издржливоста. Освен тоа, ни помага и за слабеење, ако го комбинираме со диета. Се разбира, резултатите варираат од една до друга личност, во зависност од голем број фактори како што се возраста, полот, количината на физичка активност и други.

Анаеробен тренинг

За разлика од аеробниот тренинг, кој главно е ориентиран кон движење на целото тело во исто време, анаеробниот тренинг е насочен кон индивидуални мускули, а другото име за него е „тренинг со оптоварување“. Затоа што не скокаме, ниту трчаме, т.е. не го движиме целото тело во исто време, овој тип на вежбање не бара користење на кислород во иста мера, па согоруваме главно јаглехидрати. Анаеробните вежби ги градат мускулите преку исцрпувачки активности како што се кревање тегови со висок интензитет и склекови. Со ваквото вежбање ги принудуваме мускулите да се борат со поголем товар од нашето сопствено тело, за да ги зајакнеме мускулите.

Видови анаеробни тренинзи

Овој тип на вежбање не само што ги гради и зајакнува нашите мускули, туку и ја зголемува нашата севкупна сила преку вежби со отпор користејќи ја нашата телесна тежина или машини и тегови. Трчањето на кратки растојанија, т.е. спринт и јога, исто така, може да се класифицираат како анаеробни тренинзи.

Придобивките од анаеробниот тренинг

Анаеробните вежби ги зајакнуваат коските, што го намалува ризикот од остеопороза. Исто така, може да ја подобри јачината на ‘рскавицата и лигаментите, а во исто време да ја подобри функцијата на зглобовите. Овој тип на тренинг го намалува и ризикот од потенцијални повреди и ја подобрува работата на срцето. Мускулите го штитат човечкото тело и колку посилни се мускулите, толку е позаштитено нашето тело. Конечно, анаеробното вежбање може да го зголеми нивото на вашиот добар холестерол (HDL). Секако, напоменуваме дека покрај се, потребно е во комбинацијата да се внесе здрава исхрана и дека резултатите варираат од човек до друг.